Fit-3 u l-4 ta’ Lulju 2024, id-Direttorat Eko-Għawdex fi ħdan il-Ministeru għal Għawdex u l-Ippjanar organizza workshop ta’ jumejn iffukat fuq żewġ teknoloġiji li bħalissa qed jiġu implimentati f’Għawdex bħala parti mill-proġett MED-WET : Self-regulating Low Energy Clay-based Irrigation (SLECI) u s-Solar Desalination Greenhouse (SDGH).
SLECI hija sistema ta’ irrigazzjoni taħt il-wiċċ tal-ħamrija li tuża l-forza tal-ġbid tal-ħamrija għar-rilaxx tal-ilma. Din is-sistema hija sempliċi biex tiġi prodotta u nstallata, u żżid l-effiċjenza fl-użu tal-ilma u l-enerġija; dan jagħmilha adattata għaż-żoni rurali.
SDGH tintegra l-enerġija solari, il-biedja vertikali, u d-desalinizzazzjoni tal-ilma biex tikkonverti l-ilma salmastru f’ilma ħelu adattat għat-tisqija bl-użu tal-halophytes.
Dawn il-workshops ipprovdew taħriġ għal nies tekniċi u bdiewa permezz ta’ preżentazzjonijiet, sessjonijiet onlajn, u żjarat fuq il-post sabiex tiġi ffaċilitata l-implimentazzjoni ta’ dawn it-teknoloġiji f’Għawdex.
Għal aktar informazzjoni dwar il-proġett MED-WET żur is-Sit tal-Proġett.
